ماسكات لكل انواع البشره يارب تعجبكم

ماسكات للبشرة الدهنية
وطبعا زي ما إنت عارفة إن البشرة الدهنية محتاجة عناية خاصة وده لإنها بتتميز بحساسيتها الشديدة..

علشان كده بنلاقي إن أنسب أنواع الماسكات اللي تنسابها هي الماسكات دي.

ماسك الطماطم

وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.

المكونات:
ثمره طماطم.
قشر نصف ليمونة.
عصير ليمون.

الطريقة :
اهرسي ثمرة الطماطم وضيفي إليها بشر قشر الليمون وعصير الليمون.
وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.

ماسك الردة

المكونات:
ردة.
ماء ورد.

الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة.

بعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف.

وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها.

ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. أكيد لما تجربيه هتشعري بده.

ماسك شرائح الخيار

وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك.

ماسك الخميرة

المكونات:
خميرة بيرة (هتجيبيها من عند أي فرن أو حلواني).
ماء ورد.

الطريقة:
اخلطي الخميرة البيرة مع ماء الورد، بس خلّي بالك إنك تحصلي على قوام غليظ يشبه العجينة، وادهني بيها وشك ورقبتك على الأقل لمدة ربع ساعة.

وبعد كده اشطفي وشك بالماء الدافئ كذا مرة لغاية ما تتأكدي إنه مافيش أي أثر للخميرة على وشك..

ماسكات للبشرة الجافة

دي بقى مجموعة من الماسكات اللي تناسب البشرة الجافة، وإنتِ اختاري منها اللي متوافر ليكِ.

ماسك زيت الزيتون بالبيض

المكونات:
صفار بيضة.
ملعقتان زيت زيتون.
ملعقة دقيق.
ملعقتان لبن طازج.

الطريقة:
اخلطي المكونات دي كلها مع بعضها، وبعد كده حطيها على وشك وسيبيها لمدة ربع ساعة، وبعد كده اغسلي وشك بالماء الدافئ كذا مرة وهتشوفي النتيجة.

ماسك عسل النحل بالخميرة

المكونات:
ملعقة عسل نحل.
ملعقة حليب طازج.
خميرة بيرة.

الطريقة:
اخلطي المكونات السابقة مع بعضها البعض، وبعد كده ضعي الخليط على وشك باستخدام فرشاة، وبعد كده سيبيه على وشك لمدة ربع ساعة، ثم اغسلي وشك بالماء الدافئ أكتر من مرة لغاية ما تلاقي إن الماسك مابقاش له أي أثر على وشك.

وعلى فكرة الماسك ده غير إنه بيفيد البشرة قوي، فهو كمان بيمدها بفيتامين "ب"؛ علشان كده بنلاقي إن كل بيوت التجميل بتستخدمه.

ماسك الكمثرى

المكونات:
ربع ثمرة كمثرى.
بياض بيضة.
نصف ملعقة عسل.

الطريقة:
افرمي الكمثرى جيدا وضيفي إليها خليط من العسل والبيض وامزجي كل المكونات دي مع بعضها وحطيها على وشك لمدة ربع ساعة، ثم اشطفي وشك بالماء الفاتر.

ماسكات للبشرة المختلطة

البشرة المختلطة بتجمع بين البشرة الجافة والدهنية وعلشان كده فأنسب أنواع الماسكات للبشرة هي دي..

ماسك الجزر

المكونات:
½ جزرة متوسطة الحجم.
¼ ملعقة عسل نحل.

الطريقة:
قطعي نصف الجزرة شرائح واعصريها وصفيها، وبعد ما تحصلي على هذا العصير ضيفي إليه العسل واخلطي هذا الخليط، وادهني بيه وشك لمدة ربع ساعة، وبعد كده اغسلي وشك بالماء الدافئ.

والماسك ده مش بيرطب البشرة وبس، لا ده كمان بيغذي البشرة بفيتامين أ.

ماسك الورد

المكونات:
ورد ناشف.
عسل نحل.

الطريقة:
اطحني الورد واخلطيه بالعسل وحطيه على وشك ورقبتك لمدة نصف ساعة.

ماسكات للبشرة العادية

البشرة العادية دي بقى مريحة خالص لأنها أفضل أنواع البشرة، يعني لا جافة ولا دهنية، بس برضه مايمنعش إنك تدلعي بشرتك شوية وتهتمي بيها، وعلشان كده جبنا لكم شوية ماسكات مخصوص للبشرة العادية..

ماسك الموز بالطماطم

المكونات:
نصف كوب زبادي.
ثمرة موز.
ثمرة طماطم.
عصير نصف ليمونة.

الطريقة:
تخلط هذه المكونات مع بعضها، وبعد كده تحطيها على وشك لمدة ربع ساعة، ثم تغسلي وشك بالماء الدافئ وهتشوفي النتيجة.

ماسك الخيار بعسل النحل

المكونات:
خيارة.
عسل نحل.

الطريقة:
اهرسي الخيارة جيدا في الخلاط وحطي عليها ملعقتين من عسل نحل واخلطيهم جيدا مع بعض، ثم حطي الماسك على وشك لمدة ربع ساعة، ثم اغسلي وشك بالماء الدافئ.

قناع الرده بالبيض

المكونات:
بيضة.
نصف ملعقة صغيرة عصير ليمون.
ملعقتان كبيرتان من الدقيق.

الطريقة:
اخلطي المكونات كلها مع بعضها لغاية ما تبقى على شكل عجينة، وبعد كده حطيها على وشك لمدة ربع ساعة وبعد كده اغسلي وشك بالماء الدافئ.

ماسك الزبادي والبيض

المكونات:
بياض بيضة واحدة.
4 ملاعق كبيرة زبادي.

الطريقة:
اخلطي بياض البيضة مع الزبادي، وبعدين اتركيه على وشك لمدة ربع ساعة، ثم اغسلي وشك بماء دافئ

ماسكات للبشرة الحساسة

من اسمها كده يبقى بتتميز بحساسيتها الشديدة علشان كده نلاقي إن أنسب أنواع الماسكات اللي بتناسبها هي الماسكات دي، بس خلي بالك إن مدة الماسك على بشرتك لا تزيد عن عشر دقائق فقط، لأن البشرة دي مش محتاجة أكتر من كده، وكمان مش بتستحمل أكتر من كده.

ماسك الدقيق

المكونات:
ملعقة كبيرة من الدقيق.
4 ملاعق كبيرة من ماء الورد.

الطريقة:
يتم خلط المكونات السابقة مع بعضها لغاية ما يكون على شكل عجينة لينة جدا توضع على الوجه والرقبة لمدة 10 دقائق، ثم تزال بقطعة قطن مبللة بماء الورد، ثم يغسل الوجه بالماء الفاتر.

ماسك عسل النحل الخالص

المكونات:
5 ملاعق كبيرة من عسل النحل.

الطريقة:
مفيش أسهل من دي طريقة، وهي إنك تدهني وشك بالعسل النحل وتسيبيه على وشك لمدة 10 دقائق، وبعد كده تدلكي وجهك بأطراف أصابعك المبللة بعسل النحل، وتستمري في التدليك لمدة 3 دقائق، ويا سلام بقى على الانتعاش اللي هتحصلي عليه وإنت بتمرري قطعة من القطن مبللة بماء الورد. وبعد كده تغسلي وشك بالماء الفاتر.

ماسك الجليسرين

المكونات:
2 ثمرة خيار.
جلسرين.
ملعقة دقيق كبيرة.

الطريقة:
اضربي الخيار في الخلاط، وبعد ما تضربيه ضيفي إليه كمية من الجلسرين مساوية لكمية عصير الخيار اللي عندك، وضيفي إليه ملعقة الدقيق.
بعد ما تجهزي الخليط ويكون بقى على شكل عجينة لينة حطيه على وشك وسيبيه لمدة 10 دقائق.
بعد مرور 10دقائق مرري قطعة مبللة بماء الورد على وشك وبعد كده اغسلي وشك بالماء الفاتر، وهتشوفي النتيجة.

ماسكات لحب الشباب

ماسك الكرنب أو الخس

وده بإنك تسيبي ورق الكرنب أو الخس يغلي بشدة وتاخدي المية المغلية دي بس بعد ما تبرد وتغسلي بيها الأماكن اللي فيها حبوب، وده باستخدام قطعة قطن مبلولة بالمية. وممكن تحطي المية في الثلاجة لاستخدامها أكتر من مرة.

ماسك الجزر

ابشرى الجزر بدون ما تقشريه وضيفي عليه ليمونة وسيبيهم نص ساعة، وبعدين حطيه على وشك. والماسك ده يا ستي بيخلّي لون البشرة صافي وبيزيل التجاعيد والبثور وبيخلص الوجه من أي شوائب عليه.

ماسك الرده

وده بإنك تخلطي الرده مع اللبن وتحطي الخليط ده على وشك، ثم تغسلي وشك بالمية الدافية والماسك ده بيعقم وشك وبيمنع ظهور حب الشباب.

خميرة بيرة

هاتي خميرة بيرة ودوبيها في مية واشربي كوباية منها بعد كل وجبة غدا، وده لأن الخميرة البيرة بتحتوي على فيتامين "ب" اللي بيكون علاج فعال في علاج حب الشباب.

ماسك العسل مع الليمون والجلسرين

وده عبارة عن خليط مكون من 6 معالق كبيرة عسل ومعلقة كبيرة جلسرين ومعلقة عصير ليمون مع بعض، وادهني بيهم الوجه وسيبيه لمدة ساعة وبعدين شيليه واغسلي وشك بالمية وهتشوفي النتيجة.

ماسك عصير الخيار

وده عبارة عن إنك تضربي الخيار في الخلاط وتدهني بيه وشك باستخدام قطنة وتتركيه على وشك لمدة ربع ساعة، وبعدين تغسلي وشك بالمية الدافية. واظبي على عمل الماسك ده يوميا ولمدة شهر واحد فقط.

ماسكات لتبيض البشره

1- ملعقة حليب بودرة مع قليل من الماء الدافئ كافية ليصير على شكل كريم و يوضع على الوجه و يترك ربع ساعة ثم يمسح بمنشفة دافئة

2- عمل قناع باللبن الزبادي ويوضع عليه بضع قطرات من الليمون اذا كانت البشرة الدهنية و يترك على الوجه 10 دقائق او ربع ساعة ثم يغسل

3-هذه الوصفة قرأتها في كتاب وجربتها بنفسي ... ومن فوائدها :

1- تصفي البشرة
2- وتنظفها
3- وترجع لونها الطبيعي بعد التعرض للشمس
4- وتزيل أثار الحبوب مع المداومة
5- وتعطي توريدة طبعية للوجة
6- بياض طبيعي
7- يشد الوجة من أول مرة

سوف تلاحظين الفرق خلال أربعة أيام بس بشكل ملفت وملحوظ .... الخلطة عبارة عن ماسك أتركية على الوجة حتى يجف

المقادير:
1 - زيت المرمية ( من العطار )
2 - طينة خضرة مطحونة (من العطار) أو طينة البحر الميت

الطريقة :
* سخني زيت المرامية وأضيفي له الطينة حتى يصبح مثل خليط الكيك متماسك
*اجعلية دافىء بحيث تستحمله البشره
*وبعد ذلك ضعية على الوجه مثل الماسك

بكده نكون قدمنا ليكم كل حاجة البشره بكل انواعها وبعض مشاكلها .. يارب الموضوع يعجبكم، والأهم إنه يفيدكم إن شاء الله

__________________

ميرسي على المسكات الجامدة يا قمر .

ميرسى على مروركم ياقمرات نورتم المنتدى

» عقوبه الكذب عند النمل قصه حلوه اوى يارب تعجبكم
» جبتلكم شوية نكت و يا رب تعجبكم
» الفرق بين اكل البنات واكل الا ولاد يارب ما اضرب هههههههههههه